صدود
صدودك حيل هزني مس كياني
و لاچن غفه بمسكك مسكي آني
من امسكك حيل يوجع مسكي آني
انسّيك اسمك الحط علّه بيه
*****
نجاح
الجَمال اعلن ولائه و انتمائه
الك يالصرت ارضه و انته مائه
غيرك طلع راسب و انته مائه
خذتها بدرسك اليحوي الاذيه
*****
طلب
الك بيك اصل حبي و انتمائي
و الف اي گلت احبك و انته ما أي
البعد يبَّس لهاتي و انته مائي
ارحمني بمزنتك و اعطف عليه
*****
اعتراف
تهمَّن يالمصايب ما تهمَّن
عليه شما كثرتن ما تهمَّن
اذا قيس على حبّه ماتَ هماً
انا ما اموت لجل الخان بيه
*****
صحوه متأخره
يشامت لِم شتاتك غاد ولّي
و على امرك گلب ما يحس ولّي
صحيت و گمت اعرف العلي و اللي
ملچت الإلي و طلگت العليه
*****
عزة نفس
حلاة الشخص يحفظ ماي وجهه
و نار الذل يبخها ما يوجهه
خسر كل من ضميره ما يوجهه
لطريق اليحفظ النفس الابيه
*****
موضوع: ابوذيات روعه 
الخميس أغسطس 28, 2008 8:55 am
